Ankara NATO-nun regional və qlobal strategiyasının həyata keçirilməsinə bundan sonra da töhfə verməyə hazırdır.

Bu barədə Türkiyə Milli Müdafiə Nazirliyinin ölkənin Şimali Atlantika Alyansına daxil olmasının 73-cü ildönümünə həsr olunmuş bəyanatında deyilir.

Müdafiə Nazirliyi Ankaranın NATO-ya qəbulu ilə bağlı qərarın 1952-ci il fevralın 18-də verildiyini xatırladıb. Bəyanatda deyilir: “Hərbi-siyasi blokda iştirak etdiyi onilliklər ərzində Türkiyə NATO-nun missiyalarına töhfə verərək bütün öhdəliklərini ciddi şəkildə yerinə yetirib. Montrö Konvensiyasına uyğun olaraq Bosfor və Dardanel boğazlarına nəzarət edən Ankaranın kritik rolu Qara dəniz bölgəsində güc balansının təmin edilməsinə kömək edir”. Müdafiə Nazirliyi, həmçinin ölkənin Yaxın Şərqdə, xüsusilə də İraq və Suriyadakı proseslər fonunda artan əhəmiyyətinə diqqət çəkib.

Müdafiə Nazirliyi Türkiyə ordusu və hüquq-mühafizə orqanlarının İŞİD, Əl-Qaidə, PKK/YPG və FETÖ kimi cinayətkar təşkilatların yaraqlılarına qarşı həyata keçirdiyi əməliyyatları xatırladaraq, terroru NATO üçün əsas təhdidlərdən biri adlandırıb.

“Türkiyə ordusu digərləri ilə yanaşı, NATO-nun Kosovo və İraqdakı əməliyyatlarında mühüm rol oynayıb, Alyansın dəniz və quru missiyalarında iştirak edib”, -deyə Müdafiə Nazirliyi qeyd edib.

Nazirlik diqqətə çatdırıb ki, 2024-cü ilə qədər Türkiyənin müdafiə xərcləri ölkədə ÜDM-nin təqribən 2,09 faizini təşkil edib ki, bu da Ankaraya NATO-ya üzv 32 ölkədən 23-dən birinə çevrilməyə imkan verib. Beləliklə, qarşıya qoyulan məqsədə nail olunub.

Türkiyə təşkilata bağışlanan ianələrə görə Alyansda səkkizinci, NATO missiyalarında iştirak edən personalın sayına görə isə yeddinci yerdədir. NATO Quru Komandanlığının (LANDCOM) qərargahı İzmirdə yerləşir.

“Ankara öz təcrübəsini və müdafiə sahəsindəki inkişafı müttəfiqləri ilə bölüşməyə davam etməyə hazırdır”, - deyə Türkiyə Milli Müdafiə Nazirliyi əmin edib.