Ekologiya və Təbii Sərvətlər Nazirliyinin regional idarələrinin əməkdaşları tərəfindən “İnsan Hüquqları Aylığı” çərçivəsində müxtəlif ümumtəhsil məktəblərində maarifləndirici görüşlər təşkil olunub.

Azturkxeber.az xəbər verir ki, “Təmiz ətraf mühit hər kəsin hüququdur” mövzusu ətrafında Sabirabad şəhərinin 5 nömrəli, Tərtər rayonunun Bəyimsarov, Ağdaş rayonunun Dehnəxəlil, Qobustan rayonunun Yekəxana, Bərdə rayonunun Y.Kərimov adına Yeni Daşkənd tam orta məktəblərində keçirilən görüşlərdə şagirdlərə Azərbaycan Respublikasının Konstitusiyası ilə müəyyən olunmuş sağlam ətraf mühitdə yaşamaq hüququ barədə ətraflı məlumat verilib, ətraf mühitin mühafizəsinə dair qanunvericiliyin əsas müddəaları, vətəndaşların bu sahədə hüquq və vəzifələri, təbiətə zərər vurulmasına görə nəzərdə tutulan məsuliyyət tədbirləri izah olunub. Tədbirin interaktiv hissəsində şagirdləri maraqlandıran suallar cavablandırılıb və ekoloji məsuliyyətin əhəmiyyəti vurğulanıb.

Qeyd edək ki, sözügedən maarifləndirici görüşlər Azərbaycan Respublikasının İnsan Hüquqları üzrə Müvəkkili (Ombudsman) tərəfindən hər il ənənəvi olaraq mayın 18-dən iyunun 18-dək ölkədə elan edilən “İnsan Hüquqları Aylığı” çərçivəsində təşkil olunub.