Azərbaycanın badminton millisi Bakıda keçirilən qarışıq komandaların Avropa çempionatının qrup mərhələsində ikinci oyununa çıxıb.

Birinci qrupda yer alan yığma Bakı İdman Sarayında İspaniya seçməsi ilə qarşılaşıb. Görüş rəqibin 3:2 hesablı qələbəsi ilə başa çatıb.

Qarışıq qoşa kateqoriyasında Diki Pangestu - Keişa Fatimə Zəhra tandemi Ruben Qarsiya - Lusia Rodriges qoşasına rəqib olub. Hər iki set İspaniya təmsilçilərinin üstünlüyü ilə başa çatıb - 18-21, 18-21.

Kişilərin şəxsi yarışında Edi Reski Dviçayo təcrübəli Pablo Abian ilə dueldən qalib ayrılıb. Gərgin və maraqlı mübarizə şəraitində keçən 3 setin yekununda Edi 2:1 (21-18, 8-21,21-13) hesablı qələbə qazanıb.

Qadınların şəxsi mübarizəsində Keişa Fatimə Zəhra Klara Azurmendi ilə üz-üzə gəlib. İspaniya badmintonçusu hər iki seti öndə başa vurub - 21-17, 21-14.

Kişilərin qoşa kateqoriyasında Edi Reski Dviçayo - Diki Pangestu cütü İspaniya təmsilçiləri Ruben Qarsiya və Rodriqo Sanjurjo üzərində inamlı qələbə qazanıb – 21-9, 21-14.

Qadınların qoşa kateqoriyasında Leyla Camalzadə - Həcər Nuriyeva tandemi Nikol Karulla - Lusia Rodriges cütünə 0:2 (8-21, 4-21) hesabı ilə məğlub olub.

İlk turda İngiltərə yığmasına 2:3 hesabı ilə uduzan Azərbaycan millisi qrupda son oyununu fevralın 14-də son Avropa çempionu Danimarka yığmasına qarşı keçirəcək. Bakı İdman Sarayında oynanılacaq görüş saat 10:00-da başlayacaq.