Türkiyənin Ticarət Nazirliyi onlayn ticarət üçün yeni hədəfləri açıqlayıb.

Türkiyə hökuməti 2025-ci ildə xaricə onlayn satışın həcmini 8 milyard dollara çatdırmaqla internet vasitəsilə ixracı fəal şəkildə stimullaşdırmağı davam etdirməyi planlaşdırır.

Ticarət Nazirliyindən bildirilib ki, Braziliya, İndoneziya və Yaponiya da daxil olmaqla onlayn ticarət sahəsində möhkəm əlaqələr bazasının formalaşdırılması məqsədilə il ərzində Türkiyə nümayəndə heyətlərinin xaricə çoxsaylı səfərləri təşkil olunacaq.

Nazirlik qeyd edib ki, əgər 2022-ci ildə Türkiyə məhsullarının xaricə çatdırılmasının ümumi həcmində internet ixracının payı 0,9 faiz (və ya 2,2 milyard dollar) təşkil edirdisə, 2023-cü ildə bu rəqəm 2,12 faizə (5 milyard dollar) çatıb və 2024-cü ildə 2,6 faiz həddini (6,4 milyard dollar) keçib.

“İnternet ixracının Türkiyənin iqtisadi inkişafına verdiyi töhfə durmadan artır. Bununla əlaqədar olaraq, Ticarət Nazirliyi bazarda satıcıları dəstəkləmək üçün yeni aktiv addımlar planlaşdırır. Türkiyənin internet ixracatında cari il üçün hədəf 8 milyard dollar səviyyəsində müəyyən edilib”, -deyə məlumatda qeyd edilib.

Ticarət Nazirliyi Türkiyə ilə onlayn ticarət üçün prioritet hesab edilən ölkələrin siyahısının genişləndirildiyini də açıqlayıb. Yenilənmiş siyahıya BƏƏ, Qətər, Küveyt, Nigeriya və Səudiyyə Ərəbistanı daxildir.

Bundan əlavə, Türkiyə iqtisadiyyatına dair məlumat kitabçaları hazırlanaraq Çin, Rusiya və Latın Amerikası ölkələrinin 18 aparıcı bazarında, müxtəlif sosial şəbəkələrdə və axtarış sistemlərində yerləşdirilib.