Macarıstan yaxın günlərdə “Qərb istiqamətindən” təbii qaz tədarükü üzrə ən uzunmüddətli müqavilə imzalayacaq.

Macarıstanın xarici işlər və ticarət naziri Peter Siyyarto bu barədə özünün sosial media hesabında məlumat yayıb. “Yaxın günlərdə biz növbəti uzunmüddətli təbii qaz tədarükü müqaviləsini imzalayacağıq. Bu, tariximizdə qərb istiqamətindən qaz idxalı üzrə ən uzunmüddətli müqavilə olacaq”, – deyə nazir qeyd edib.

Peter Siyyartonun sözlərinə görə, Macarıstan enerji resurslarının tədarükündə daim diversifikasiyaya böyük önəm verib. Bununla belə, nazir Budapeştin qazı hansı “Qərb ölkəsindən” alacağını deməyib.

Hazırda Macarıstan qaz tədarükünün əsas hissəsini “Türk axını” qaz kəməri ilə “Qazprom” kompaniyasından təmin edir. 2022-ci ildə bu marşrutla ölkəyə 4,8 milyard kubmetr qaz nəql olunub. Rəsmi məlumatlara görə, 2023-cü ildə bu göstərici 5,6 milyard kubmetrə, 2024-cü ildə isə rekord həddə – 7,6 milyard kubmetrə çatıb.