İnsan hüquqlarının müdafiəsi sahəsində göstərilən etimadın və məsuliyyətin yeni mərhələsi.

3 noyabr 2026-cı il tarixində Azərbaycan Respublikasının ictimai-siyasi həyatında mühüm hadisə baş verib. Azərbaycan Respublikası Milli Məclisinin plenar iclasında keçirilən səsvermənin nəticələrinə əsasən, Səbinə Yaşar qızı Əliyeva yenidən Azərbaycan Respublikasının İnsan Hüquqları üzrə Müvəkkili (Ombudsman) vəzifəsinə seçilib. O, növbəti 7 il müddətində bu məsul vəzifəni icra edəcək.

Milli Məclisdə keçirilən səsvermədə Səbinə Əliyeva 100 deputatın səsini qazanaraq digər namizədləri qabaqlayıb. Onunla yanaşı, Ombudsman vəzifəsinə Ceyhun Qaracayev və Elşanə Vəliyevanın da namizədlikləri irəli sürülmüşdü. Yenidən seçildikdən sonra Səbinə Əliyeva Milli Məclisdə and içərək üzərinə düşən vəzifələri şərəf və ləyaqətlə yerinə yetirəcəyinə, Azərbaycan Respublikasının Konstitusiyasına və qanunlarına əməl edəcəyinə dair öhdəlik götürüb.

Səbinə Əliyevanın həyat və fəaliyyət yolu yüksək hüquqi təhsil, peşəkar hazırlıq və dövlət idarəçiliyi sahəsində zəngin təcrübə ilə səciyyələnir.

O, 7 may 1980-ci ildə Bakı şəhərində anadan olub. Bakı Dövlət Universitetinin Hüquq fakültəsində bakalavr və magistratura təhsilini fərqlənmə diplomları ilə başa vurub. Daha sonra Azərbaycan Respublikasının Prezidenti yanında Dövlət İdarəçilik Akademiyasında beynəlxalq münasibətlər ixtisası üzrə əlavə ali təhsil alıb. 2016-cı ildə hüquq üzrə fəlsəfə doktoru elmi dərəcəsinə layiq görülüb.

Əmək fəaliyyətinə 2000-ci ildə Azərbaycan Respublikasının Konstitusiya Məhkəməsində başlayan Səbinə Əliyeva müxtəlif məsul vəzifələrdə çalışıb. 2015-ci ildə Konstitusiya Məhkəməsi Aparatı rəhbərinin müavini vəzifəsinə təyin edilib.

29 noyabr 2019-cu ildə Milli Məclis tərəfindən ilk dəfə Azərbaycan Respublikasının İnsan Hüquqları üzrə Müvəkkili seçilən Səbinə Əliyeva ötən illər ərzində insan hüquq və azadlıqlarının müdafiəsi, hüquqi maarifləndirmə, vətəndaş müraciətlərinin araşdırılması və Ombudsman institutunun inkişafı istiqamətində fəaliyyət göstərib.

Ombudsman institutunun əsas mahiyyəti insan və vətəndaş hüquq və azadlıqlarının müdafiəsinə xidmət etmək, dövlət orqanlarının və vəzifəli şəxslərin fəaliyyətində qanunçuluğa və insan hüquqlarına riayət olunmasına dəstək göstərməkdir. Bu baxımdan Səbinə Əliyevanın yenidən Ombudsman seçilməsi qarşıdakı dövrdə də insan hüquqlarının müdafiəsi istiqamətində institusional fəaliyyətin davam etdirilməsi üçün mühüm əhəmiyyət daşıyır.

Ötən dövrdə Ombudsman təsisatının fəaliyyətində uşaqların, qadınların, yaşlı insanların, əlilliyi olan şəxslərin, sosial baxımdan həssas qrupların və digər şəxslərin hüquqlarının müdafiəsi, vətəndaş müraciətlərinin araşdırılması, hüquqi maarifləndirmə və preventiv mexanizmlərin təkmilləşdirilməsi əsas istiqamətlərdən olub.

Xüsusilə həssas əhali qruplarının hüquqlarının qorunması, inklüziv cəmiyyətin formalaşdırılması, hər kəs üçün bərabər imkanların yaradılması və hüquqi müdafiə mexanizmlərinin əlçatanlığının artırılması müasir dövrün mühüm çağırışlarıdır.

Səbinə Əliyevanın fəaliyyəti yalnız ölkə daxilində deyil, beynəlxalq müstəvidə də diqqətəlayiq istiqamətləri əhatə edir.

O, 2023-cü ildə Asiya Ombudsmanlar Assosiasiyasının vitse-prezidenti seçilib, həmçinin İslam Əməkdaşlıq Təşkilatının Ombudsmanlar Assosiasiyasının İdarə Heyətində təmsil olunub.

Bu təmsilçilik Azərbaycanın insan hüquqları sahəsində beynəlxalq əməkdaşlığının genişləndirilməsi, təcrübə mübadiləsinin inkişafı və milli Ombudsman institutunun beynəlxalq platformalarda iştirakının artırılması baxımından əhəmiyyətlidir.

44 günlük Vətən müharibəsi və postmüharibə dövründə insan hüquqlarının müdafiəsi, münaqişədən zərər çəkmiş şəxslərin hüquqlarının araşdırılması, humanitar məsələlərin beynəlxalq ictimaiyyətin diqqətinə çatdırılması da Ombudsman fəaliyyətinin mühüm istiqamətlərindən olub.

İşğaldan azad edilmiş ərazilərdə Böyük Qayıdış prosesinin həyata keçirilməsi, keçmiş məcburi köçkünlərin doğma yurdlarına qayıdışı, onların sosial, iqtisadi və digər hüquqlarının təmin edilməsi də qarşıdakı dövr üçün əhəmiyyətli məsələlərdəndir.

Yenidən Ombudsman seçildikdən sonra Səbinə Əliyeva çıxışında qarşıdakı fəaliyyət dövrünün əsas istiqamətlərinə də toxunub.

Onun diqqətə çatdırdığı prioritetlər sırasında həssas əhali qruplarının hüquqlarının müdafiəsinin gücləndirilməsi, milli preventiv və müstəqil monitorinq mexanizmlərinin təkmilləşdirilməsi, rəqəmsal transformasiya və süni intellekt dövründə insan hüquqlarının qorunmasına müasir yanaşmaların tətbiqi xüsusi yer tutur.

Bununla yanaşı, hüquqi maarifləndirmənin genişləndirilməsi, vətəndaş cəmiyyəti institutları ilə əməkdaşlığın gücləndirilməsi, ictimai iştirakçılığın təşviqi və Ombudsman institutunun fəaliyyətinin daha da təkmilləşdirilməsi qarşıya qoyulan mühüm hədəflərdəndir.

Xüsusilə müasir texnologiyaların sürətlə inkişaf etdiyi bir dövrdə şəxsi məlumatların qorunması, rəqəmsal hüquqlar, informasiya təhlükəsizliyi və süni intellektin insan hüquqlarına mümkün təsirləri yeni yanaşmalar tələb edir.

Ombudsman institutunun bu istiqamətlərdə fəal mövqe nümayiş etdirməsi və vətəndaşların hüquqi müdafiə imkanlarının genişləndirilməsi mühüm əhəmiyyət kəsb edir.

Səbinə Yaşar qızı Əliyevanı Azərbaycan Respublikasının İnsan Hüquqları üzrə Müvəkkili (Ombudsman) vəzifəsinə yenidən seçilməsi münasibətilə səmimi-qəlbdən təbrik edirik!

Bu yüksək və məsuliyyətli vəzifəyə yenidən seçilməsi ona göstərilən etimadın, insan hüquqlarının müdafiəsi istiqamətində fəaliyyətinə verilən dəyərin və üzərinə götürdüyü mühüm missiyanın davam etdirilməsinin ifadəsidir.

Hörmətli Səbinə xanıma yeni fəaliyyət dövründə möhkəm cansağlığı, uzun ömür, ailə səadəti, tükənməz enerji, məsuliyyətli fəaliyyətində uğurlar və yeni nailiyyətlər arzulayırıq.

Arzu edirik ki, qarşıdakı yeddi il ərzində insan hüquq və azadlıqlarının müdafiəsi, ədalətin və qanunun aliliyinin möhkəmləndirilməsi, vətəndaş məmnunluğunun artırılması və Ombudsman institutunun daha da inkişafı naminə həyata keçirilən fəaliyyət uğurlu nəticələrlə yadda qalsın.

Qoy hər bir vətəndaşın hüququnun qorunması, hər bir müraciətin diqqətlə araşdırılması, ədalət və insan ləyaqətinin uca tutulması fəaliyyətinizin dəyişməz prinsipləri olsun!

Bir daha təbrik edir, yeni və şərəfli fəaliyyət mərhələnizdə Sizə böyük uğurlar arzulayırıq!

Azturkxeber.az İnformasiya Agentliyinin rəhbəri Sahilə Bayramlı