15 İyun Azərbaycan Respublikasının tarixində mühüm əhəmiyyət kəsb edən və rəsmi dövlət bayramı kimi qeyd olunan Azərbaycan Xalqının Milli Qurtuluş Günüdür. Bu əlamətdar tarix ölkəmizin müstəqilliyinin qorunması, dövlətçiliyin möhkəmləndirilməsi və siyasi sabitliyin təmin olunması baxımından xüsusi önəmə malikdir.

1993-cü ilin iyun ayında Azərbaycan mürəkkəb ictimai-siyasi vəziyyətlə üz-üzə qalmış, ölkədə xaos, idarəetmə böhranı və parçalanma təhlükəsi yaranmışdı. Belə bir taleyüklü dövrdə xalqın təkidli tələbi ilə Ümummilli Lider Heydər Əliyev yenidən siyasi hakimiyyətə qayıtmış və 15 iyun 1993-cü ildə Azərbaycan Ali Sovetinin sədri seçilmişdir. Bu hadisə ölkənin dərin böhrandan çıxarılması, vətəndaş qarşıdurmasının qarşısının alınması və dövlət müstəqilliyinin qorunması istiqamətində dönüş nöqtəsi olmuşdur.

Ümummilli Lider Heydər Əliyevin rəhbərliyi altında ölkədə ictimai-siyasi sabitlik bərpa edilmiş, dövlət quruculuğu prosesinə başlanılmış, iqtisadi inkişafın və beynəlxalq əməkdaşlığın əsasları formalaşdırılmışdır. Məhz bu səbəbdən 15 İyun Azərbaycan xalqının xilası və milli dövlətçiliyin möhkəmlənməsi günü kimi tarixə düşmüşdür.

Azərbaycan Respublikasının Milli Məclisinin qərarı ilə 1997-ci ildən etibarən 15 İyun – Azərbaycan Xalqının Milli Qurtuluş Günü hər il dövlət səviyyəsində qeyd olunur. Bu gün xalqımızın milli birlik, həmrəylik və dövlətçilik ənənələrinə sadiqliyinin ifadəsi kimi böyük ehtiramla anılır.

Milli Qurtuluş Günü müstəqil Azərbaycanın inkişaf yolunda əldə etdiyi nailiyyətlərin təməlində dayanan tarixi hadisələri xatırlatmaqla yanaşı, gələcək nəsillərə dövlətçiliyin qorunmasının və milli həmrəyliyin əhəmiyyətini aşılayır.

Sahilə Bayramlı