Oxu Savadlılığının İnkişafı üzrə Beynəlxalq Qiymətləndirmə Tədqiqatının (PIRLS 2026) əsas mərhələsi gələn ilin aprel-may ayları ərzində ölkənin bütün bölgələrindən seçilmiş 224 məktəb üzrə 9 minə yaxın şagird arasında keçiriləcək.

Bu barədə Elm və Təhsil Nazirliyindən məlumat verilib.

Bildirilib ki, 2025-ci ilin aprel ayında Azərbaycanda 4-cü sinif şagirdlərinin oxuyub-anlama bacarığını qiymətləndirən PIRLS 2026-nın sınaq mərhələsi keçirilib. Sınaq mərhələsində Azərbaycanın bütün bölgələrindən seçilmiş 25 məktəb üzrə 32 sinifdən 700-dən çox şagird həm imtahan, həm də sorğu mərhələsi üzrə tapşırıqları cavablandırıb. Eyni zamanda, seçilmiş 700-dən çox şagirdin valideyni, həmin şagirdlərin təhsil aldığı 25 məktəbin direktoru və seçilmiş hər sinifdən ümumilikdə 32 müəllim nəzərdə tutulmuş sorğuda iştirak edib.