Parlamentlərarası İttifaqın (PAİ) gənc parlamentarilərin XII Qlobal Konfransı bu il sentyabrın 4-dən 6-dək Səmərqənddə keçiriləcək.

Azturkxeber.az rəsmi UZA agentliyinə istinadla xəbər verir ki, yüksəkkeyfiyyətli hazırlığı və tədbirin uğurlu təşkilini təmin etmək məqsədilə Özbəkistan Ali Məclisi Senatının sədri Tənzilə Narbayevanın rəhbərliyi ilə Təşkilat Komitəsinin iclası keçirilib.

Qeyd edilib ki, konfransın keçirilməsi təşəbbüsü Özbəkistan Prezidenti Şavkat Mirziyoyev tərəfindən 2025-ci ilin aprel ayında Daşkənddə keçirilən PAİ-nin 150-ci Assambleyasında irəli sürülüb. Dövlət başçısı çıxışında gənclər siyasəti məsələlərinə xüsusi diqqət yetirib və gənc nəslin milli parlamentlərin və PAİ-nin fəaliyyətində daha fəal iştirakının vacibliyini vurğulayıb. Onun təklifi Parlamentlərarası İttifaqın 180-dən çox üzv dövləti tərəfindən dəstəklənib. 2025-ci ilin oktyabrında Parlamentlərarası İttifaqın Cenevrədə keçirilən 151-ci Assambleyasında Ali Məclis Senatı və PAİ bu tədbirin Səmərqənddə keçirilməsi barədə müqavilə imzalayıb.

Təşkilat Komitəsinin iclasında çıxış edən Tənzilə Narbayeva vurğulayıb ki, belə mötəbər beynəlxalq tədbirin Özbəkistanda keçirilməsi qərarı ölkəyə olan yüksək etimadın və dövlət başçısının rəhbərliyi altında həyata keçirilən ardıcıl parlament islahatlarının nəticələrinin göstəricisidir.

Konfransın gündəliyinə münaqişə və rəqəmsal transformasiya kontekstində gənclərin hüquqlarının qorunması, onların siyasi imkanlarının genişləndirilməsi, iqtisadi hüquqlarının və məşğulluğunun təmin edilməsi, qadınlara və gənclərə qarşı zorakılığın qarşısının alınması məsələləri daxildir. Bundan əlavə, tədbir çərçivəsində Dayanıqlı İnkişaf Məqsədlərinə həsr olunmuş biraylıq kampaniyanın keçirilməsi planlaşdırılır.