ABŞ administrasiyası təhlükəli biotibbi tədqiqatların, o cümlədən patogenlərin təsirini artırmağa yönəlmiş araşdırmaların federal vəsaitlə maliyyələşdirilməsini qadağan edib.

Bu barədə ABŞ Dövlət Departamenti və Səhiyyə və İnsan Xidmətləri Departamentinin birgə bəyanatında bildirilib.

Yeni qaydalara əsasən, ABŞ və digər ölkələrdə aparılan, insan həyatı və milli təhlükəsizlik üçün risk yarada biləcək “funksiya qazanması” tədqiqatlarına federal dəstək göstərilməyəcək.

Vaşinqton bildirib ki, təhlükəsizlik tədbirlərinə baxmayaraq, vaksin, dərman və diaqnostika vasitələrinin hazırlanmasına yönəlmiş biotibbi tədqiqatların dəstəklənməsi davam etdiriləcək. ABŞ digər ölkələri də oxşar nəzarət tədbirləri görməyə çağırıb.