Azərbaycan xalqının tarixində elə günlər var ki, onlar əsrlər boyu yaddaşlardan silinmir, nəsillərdən-nəsillərə qürur və iftixar hissi ilə ötürülür. 8 Noyabr – Zəfər Günü də xalqımızın tarixində belə əlamətdar və unudulmaz günlərdən biridir. Bu şanlı tarix Azərbaycan dövlətinin qüdrətini, xalqımızın birliyini, milli iradəsini və qəhrəman Azərbaycan Ordusunun gücünü bütün dünyaya nümayiş etdirmişdir.

2020-ci il sentyabrın 27-də başlayan və 44 gün davam edən Vətən müharibəsi Azərbaycan tarixinin ən mühüm hadisələrindən biri olmuşdur. Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə rəşadətli Azərbaycan Ordusu torpaqlarımızın işğaldan azad edilməsi uğrunda misilsiz qəhrəmanlıq göstərmişdir. Döyüş meydanında nümayiş etdirilən şücaət, əzmkarlıq və yüksək döyüş hazırlığı nəticəsində Azərbaycan Ordusu tarixi Zəfərə imza atmışdır.

Bu qələbənin ən mühüm hadisələrindən biri noyabrın 8-də Şuşa şəhərinin işğaldan azad edilməsi olmuşdur. Şuşanın azad olunması Vətən müharibəsinin taleyində həlledici rol oynamış və Azərbaycan xalqının böyük sevincinə səbəb olmuşdur. Məhz bu tarixi hadisənin şərəfinə 8 Noyabr ölkəmizdə Zəfər Günü kimi təsis edilmişdir.

Zəfər yalnız hərbi uğur deyil, həm də Azərbaycan xalqının milli birliyinin, dövlətə və Vətənə bağlılığının təntənəsidir. Müharibə zamanı arxa cəbhədə xalqımızın göstərdiyi həmrəylik, əsgər və zabitlərimizin döyüş meydanındakı qəhrəmanlığı, şəhidlərimizin müqəddəs qanı və qazilərimizin fədakarlığı bu qələbənin əsasını təşkil etmişdir.

Azərbaycan Prezidenti cənab İlham Əliyevin qətiyyətli siyasi iradəsi, diplomatik fəaliyyəti və Ali Baş Komandan kimi rəhbərliyi Zəfərin əldə olunmasında mühüm rol oynamışdır. Dövlət başçısının müharibə dövründə xalqa müraciətləri, beynəlxalq mediaya verdiyi müsahibələr və nümayiş etdirdiyi prinsipial mövqe Azərbaycan həqiqətlərinin dünyaya çatdırılmasına xidmət etmişdir.

8 Noyabr – Zəfər Günü hər il ölkəmizdə böyük qürur və təntənə ilə qeyd olunur. Bu gün Azərbaycanın suverenliyi, ərazi bütövlüyü və milli birliyi uğrunda canından keçmiş şəhidlərimizin əziz xatirəsi dərin ehtiramla yad edilir, qazilərimizin qəhrəmanlığı minnətdarlıqla anılır.

Bu möhtəşəm qələbə gələcək nəsillər üçün böyük örnəkdir. Gənclərimiz Zəfər tarixini öyrənməli, şəhidlərimizin qəhrəmanlığını unutmamalı, Vətənə sevgi və dövlətə sədaqət ruhunda yetişməlidirlər.

8 Noyabr – Zəfər Günü Azərbaycan xalqının yenilməz iradəsinin, milli birliyinin və müstəqil dövlətçilik əzminin rəmzidir. Bu tarix bizə bir daha sübut etdi ki, xalq və dövlət bir olduqda, güclü ordu və qətiyyətli rəhbərlik olduqda ən böyük hədəflərə nail olmaq mümkündür.

Qoy bu şanlı Zəfər tariximizdə daim yaşasın! Şəhidlərimizin ruhu qarşısında baş əyir, qazilərimizə möhkəm cansağlığı arzulayırıq.

Yaşasın Azərbaycan!

Yaşasın müzəffər Azərbaycan Ordusu!

Eşq olsun qalib Azərbaycan xalqına!

Azturkxeber.az İnformasiya Agentliyinin rəhbəri Sahilə Bayramlı