Ombudsmanların Beynəlxalq Bakı Sammiti çərçivəsində Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva və Monteneqronun İnsan Hüquqları və Azadlıqlarının Müdafiəçisi Sinişa Byekoviç arasında Anlaşma Memorandumunun imzalanma mərasimi keçirilib.

Azturkxeber.az xəbər verir ki, Memorandum təsisatlar arasında insan hüquqlarının müdafiəsi sahəsində əməkdaşlığın genişləndirilməsinə, birgə praktiki və elmi-araşdırma fəaliyyətinin gücləndirilməsinə, eləcə də hər iki tərəf üçün aktual olan istiqamətlərdə maarifləndirmə işlərinin aparılmasına xidmət edir.

Ombudsman Səbinə Əliyeva imzalanmış Anlaşma Memorandumunun hər iki ölkənin ombudsman təsisatları arasında əməkdaşlıq əlaqələrinin daha da güclənməsinə, insan hüquq və azadlıqlarının daha səmərəli müdafiəsinə şərait yaradacağını diqqətə çatdırıb.