Bu gün Türkiyə Cümhuriyyətinin qurucusu və ilk Prezidenti Mustafa Kamal Atatürkün vəfatından 88 il ötür.

Mustafa Kamal Atatürk 1881-ci ildə Osmanlı imperiyasının Saloniki şəhərində anadan olub. O, hərbi və siyasi fəaliyyəti ilə Türkiyə tarixində mühüm iz qoymuş, ölkənin müstəqillik mübarizəsinə rəhbərlik etmişdir.

1919-cu ildə başlanan Türkiyə İstiqlal müharibəsinin lideri olan Atatürk 1923-cü il oktyabrın 29-da Türkiyə Cümhuriyyətinin elan edilməsinə nail olmuş və ölkənin ilk Prezidenti seçilmişdir. Onun rəhbərliyi ilə Türkiyədə genişmiqyaslı siyasi, hüquqi, iqtisadi və mədəni islahatlar həyata keçirilmişdir.

Atatürk dövlət idarəçiliyində dünyəvilik prinsipinin möhkəmləndirilməsi, təhsil sisteminin yenilənməsi, qadın hüquqlarının genişləndirilməsi və müasir dövlət institutlarının formalaşdırılması istiqamətində mühüm addımlar atmışdır.

Mustafa Kamal Atatürk 1938-ci il noyabrın 10-da, saat 09:05-də İstanbulun Dolmabahçe sarayında vəfat etmişdir. Onun ölüm günü Türkiyədə hər il böyük ehtiram və hüznlə yad edilir. Həmin gün saat 09:05-də ölkə üzrə həyat bir anlıq dayanır, sirenlər səslənir və insanlar Atatürkün xatirəsini bir dəqiqəlik sükutla anırlar.

Atatürkün “Yurdda sülh, cahanda sülh” prinsipi bu gün də Türkiyənin dövlətçilik fəlsəfəsinin əsas istiqamətlərindən biri hesab olunur.

88 il keçməsinə baxmayaraq, Mustafa Kamal Atatürkün ideyaları, dövlətçilik irsi və Türkiyə tarixindəki rolu öz əhəmiyyətini qoruyub saxlayır. O, yalnız Türkiyə xalqının deyil, dünya tarixinin də mühüm şəxsiyyətlərindən biri kimi xatırlanır.

Mustafa Kamal Atatürk ehtiramla anılır.

Ruhu şad olsun!

Azturkxeber.az İnformasiya Agentliyinin rəhbəri Sahilə Bayramlı