azturkxeber.az
http://azturkxeber.az

“Sonsuzluğun simfoniyası”: Ankarada ucaldılan monumental kompozisiya tarixi-mədəni irsimizi simvolizə edir

17-11-2026

Ankaranın Türk Dövlətləri Mədəniyyət Parkındakı Azərbaycan pavilyonunun önündə “Sonsuzluğun simfoniyası” adlı monumental kompozisiya ucaldılıb.

Bu barədə Azturkxeber.az-a Mədəniyyət Nazirliyinin mətbuat xidmətindən məlumat verilib.

Bildirilib ki, Azərbaycan Respublikasının Əməkdar rəssamı Rəşad Mehdiyevin müəllifi olduğu əsər cilalanmış paslanmayan poladdan hazırlanıb. Müasir monumental plastika nümunəsi olan kompozisiya Azərbaycanın milli kimliyini, zəngin mədəni yaddaşını və mənəvi varislik ənənələrini təcəssüm etdirir.

Fəzada kəsişən spiralvari formalardan qurulan kompozisiyada Azərbaycan ornamental sənətinin səciyyəvi motivləri – buta, od rəmzi və Xəzər dalğalarının plastikası əksini tapır. Mərkəzdəki DNT-nin qoşa spiral modeli genetik yaddaşın qorunmasını və milli mədəni kodun əbədiliyini, dövri quruluş isə “Əbədiyyət düyünü” ideyasını simvolizə edir. Dekorativ naxışlarda Qarabağ və Şirvan xalçaçılıq məktəblərinin, eləcə də Azərbaycan memarlıq irsinin bədii elementlərindən istifadə olunub.

Cilalanmış polad səthin güzgü effekti əsərlə ətraf mühit arasında vizual əlaqə yaradır. Kompozisiya Azərbaycanın mədəni irsini müasir sənət dili ilə təqdim etməklə yanaşı, Şərqlə Qərb arasında mədəni körpü ideyasını da ifadə edir.






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
«    November 2026    »
MonTueWedThuFriSatSun
 1
2345678
9101112131415
16171819202122
23242526272829
30