Uzun sürən quraqlıq və idarəetmədə buraxılmış səhvlərin birləşməsi ABŞ-nin iri şəhərlərindən birini su ehtiyatlarının tam tükənməsi həddinə gətirib çıxara bilər.

“Inside Climate News” nəşrinin məlumatına görə, Texas ştatının Korpus-Kristi şəhəri artıq gələn il ərzində su ehtiyatlarını tam tükədə bilər. Bu şəhər ştatın əhalisinə görə səkkizinci ən böyük şəhəridir və Meksika körfəzi sahilində mühüm sənaye mərkəzi sayılır.

Onun su təchizatı sistemi 500 mindən çox sakinə, həmçinin bölgədə cəmləşən iri kimya müəssisələrinə, neft obyektlərinə və plastik istehsalı zavodlarına xidmət göstərir.

Jurnalistlərin qeyd etdiklərinə görə, Korpus-Kristi ABŞ-də tamamilə susuz qala biləcək ilk şəhərə çevrilə bilər. Beş il davam edən quraqlıqdan sonra şəhərin su anbarlarında su səviyyəsi sürətlə azalır. Quraqlıq dövrünü dərhal dayandırmaq mümkün olmasa da, mövcud vəziyyət Texasın cənubunda yaxınlaşan su böhranı ilə bağlı illərlə edilən xəbərdarlıqların məntiqi nəticəsi hesab olunur.

Şəhər meri Piter Zanoni bildirib ki, artıq sentyabr ayından su istehlakını 25 faiz, yəni gündə təxminən 60 milyon litr azaltmaq lazım gələcək.

Bu məhdudiyyətlərin necə tətbiq olunacağı hələ məlum deyil. Lakin nəticələr ciddi ola bilər, belə ki, məktəblər, xəstəxanalar və sakinlər suya qənaət etməli olacaq, biznes və sənaye müəssisələri isə ayrıca çətinliklərlə üzləşəcək.

Klimatoloqlar uzun illərdir su ehtiyatlarından səmərəsiz istifadənin nəticələri barədə xəbərdarlıq edirlər. Kolumbiya Universitetinin Su Tədqiqatları Mərkəzinin nümayəndəsi Şennon Markesin sözlərinə görə, Korpus-Kristidə yaranmış vəziyyət yalnız zəncirin ilk halqası ola bilər.

“Hazırda Korpus-Kristidə baş verənlər heç də ilk belə rast gəlinən hadisə deyil. Əgər qabaqcadan planlaşdırmağa başlamasaq, bizi gözləyən ssenari tam da bu olacaq”, – deyə o vurğulayıb.