Macarıstanın mədəniyyət və innovasiya naziri Balazs Hankonun rəhbərlik etdiyi nümayəndə heyəti Bakı Dövlət Universitetində (BDU) olub.

Bu barədə BDU-dan bildirilib.

BDU-nun elm və innovasiyalar üzrə prorektoru Hüseyn Məmmədov qonaqlara universitetin elm, təhsil, innovasiya, mədəniyyət sahələrində fəaliyyəti, həyata keçirdiyi layihələr barədə məlumat verib. BDU-nun Macarıstan universitetləri ilə əlaqələrin genişləndirilməsində maraqlı olduğunu vurğulayıb.

Nazir Balazs Hanko Azərbaycana səfərindən, ölkənin ən böyük və qədim ali məktəbi BDU-da olmaqdan məmnunluğunu bildirib, görüşün təşkilinə görə təşəkkür edib. O, iki ölkə arasında elm və təhsil sahəsində əməkdaşlığın zəruri olduğunu diqqətə çatdırıb.

Qonaqlar BDU-da fəaliyyət göstərən “Ekoməkan”da olublar. Sonra qonaqlar BDU Elmi Kitabxanasının Azərbaycan-Macarıstan münasibətlərinə həsr etdiyi sərgi ilə tanış olublar. Sərgidə Azərbaycan və Macarıstan münasibətlərinə, enerji təhlükəsizliyi, tarix, mədəniyyət və ədəbiyyata dair 70-dən çox nəşr yer alıb.

Qonaqlar BDU-nun Heydər Əliyev muzeyini ziyarət ediblər. Nazir Balazs Hanko “Xatirə kitabı”na ürək sözlərini yazıb. Sonda nümayəndə heyəti BDU-nun Heydər Əliyev lektoriyası, Faydalı qazıntılar muzeyi, Mədəniyyət-Yaradıcılıq Mərkəzinin fəaliyyəti ilə tanış olublar.