Niderlandın Haaqa şəhərində sağçı radikalların keçirdiyi mitinq nəzarətdən çıxaraq iğtişaşlarla nəticələnib.

Hökumətdən miqrasiya və sığınacaq məsələlərində daha sərt qanunların qəbul olunmasını tələb edən nümayişçilər polisə hücum edib, xidməti maşını yandırıb və liberalyönümlü D66 partiyasının ofisinə zərər vurublar. Polis gözyaşardıcı qaz və su şırnaqlarından istifadə edərək kütləni dağıdıb. Nəticədə 30 nəfər saxlanılıb, iki polis əməkdaşı xəsarət alıb. Hadisə zamanı təxminən 1500 etirazçı avtomagistralı bağlayaraq nəqliyyatı iflic edib.

Niderlandın müvəqqəti hökuməti və bir neçə partiya zorakılığı kəskin şəkildə pisləyib. Sağ populist siyasətçi Geert Vilders də hadisələri pisləyərək, iğtişaşçıların sərt şəkildə cəzalandırılmasını tələb edib. Onun rəhbərlik etdiyi PVV partiyası uzun müddətdir ölkədə ən sərt sığınacaq qanununun qəbulunu istəyir.