Almaniyanın Şimali Reyn-Festfaliya əyalətinin Sassenberq şəhərində polis bıçaqla hücum edən 25 yaşlı kişiyə atəş açaraq ağır yaralayıb.

Prokurorluq və polis orqanlarının məlumatında qonşuları ilə mübahisə zamanı iki nəfərə xəsarət yetirən xorvatiyalı şəxsin daha sonra polis əməkdaşlarına hücum etdiyi bildirilib. Polis əməkdaşları dəfələrlə etdikləri xəbərdarlıqlara məhəl qoymayan həmin şəxsə atəş açmaq məcburiyyətində qalıblar. Sinəsindən xəsarət alan şəxs xəstəxanaya yerləşdirilib.

Oxşar hadisə Baden-Vürttemberq əyalətinin Ulm şəhərində də baş verib. Bu dəfə isə polisə bıçaqla hücum edən şəxsə atəş açılıb. Lakin onun ciddi xəsarət almadığı, zərərsizləşdirilərək xəstəxanaya aparıldığı bildirilir.

Hər iki hadisə ilə bağlı araşdırma aparılır.