Noyabrın 4-də polis əməkdaşları tərəfindən ölkə ərazisində həyata keçirilən tədbirlər nəticəsində 64 cinayətin açılması təmin olunub. Onlardan 53-ü cari, 11-i isə əvvəlki dövrlərdə törədilmiş cinayətlərdir.

Azturkxeber.az-verilən məlumata görə, hesabat günü ərzində axtarışda olan 130 nəfər saxlanılıb. Onlardan 94-ü borclu şəxs olub. Həmçinin cinayət törətməkdə şübhəli bilinən 62 nəfər saxlanılıb, itkin düşmüş şəxs qismində axtarılan 6 nəfər tapılıb.

Polis əməkdaşları tərəfindən 18 narkotik vasitələrin qanunsuz dövriyyəsi və 4 qanunsuz silah-sursat faktı aşkarlanıb. Dələduzluq cinayətlərinə görə axtarışda olan 9 nəfər də saxlanılıb.

Əməliyyat tədbirləri nəticəsində ümumi çəkisi 17,5 kiloqram olan narkotik vasitələr qanunsuz dövriyyədən çıxarılıb. Bundan başqa, 4 tüfəng və 465 ədəd müxtəlif çaplı patron aşkar edilərək götürülüb.