2026-cı ilin birinci rübündə dövlət qurumlarının informasiya sistemlərində 1 milyon 48 min 869 kibertəhdid aşkarlanaraq zərərsizləşdirilib.

Xüsusi Rabitə və İnformasiya Təhlükəsizliyi Dövlət Xidmətindən (XRİTDX) bildirilib ki, aparılan monitorinqlər nəticəsində 274 kiberhücum göstəricisi (IOC) müəyyən edilərək mərkəzləşdirilmiş qaydada bloklanıb. Onlardan 213-ü daxili araşdırmalar, 61-i isə dövlət qurumlarının müraciətləri əsasında aşkarlanıb.

“Həmçinin dövlət elektron poçt xidmətində emal edilən 4,6 milyondan çox məktubdan 1,4 milyona yaxını zərərli olduğu üçün bloklanıb. Bundan əlavə, dövlət qurumlarının veb-saytlarında 194 audit və nüfuzetmə testi aparılıb, təhlükəsizlik boşluqları ilə bağlı 34 analitik hesabat hazırlanıb”, - deyə qurumun yaydığı məlumatda vurğulanır.

XRİTDX qeyd edir ki, görülən kompleks tədbirlər ölkənin kibertəhlükəsizlik ekosisteminin gücləndirilməsinə və rəqəmsal dayanıqlığın artırılmasına xidmət edir.