Naxçıvan Dövlət Universiteti müəllimləri üçün (NDU) artıq dörd aydır davam edən beynəlxalq layihə üzrə təlimlər yekunlaşıb. Layihə British Council, BP və Naxçıvan Dövlət Universitetinin birgə əməkdaşlığı çərçivəsində reallaşıb.  Təlimlərdə universitetin ingilis dili müəllimləri və tədrisi ingilis dilində olan ixtisaslarda dərs deyən müəllimlər iştirak ediblər.

Proqrama uyğun olaraq müəllimlərin ingilis dili nəzəri bilikləri və tədris bacarıqları təkmilləşdirilib. Bu əsasda onların yazı, oxu, dinləmə, danışıq bacarıqları, söz ehtiyatı və qrammatika üzrə bilikləri qiymətləndirilib. Britaniya Konsulluğunun dörd təlimçisi nəzərdə tutulan dərslər əsaslı onlayn təlimlər keçib. 120 saatlıq onlayn təlimlər öncə 39 müəllimin iştirakı  ilə başlanıb. Yekunda isə təlimləri uğurla tamamlayan 28 müəllim imtahanda iştirak hüququ qazanıb. 13-14 mart tarixlərində NDU-nun IELTS Mərkəzində  yekun APTIS imtahanı keçirilib. Layihədə iştirak edən müəllimlərin  ingilis dili biliyi qiymətləndirilib. 
Xatırladaq ki, 16 oktyabr 2024-cü il tarixində ilk olaraq təlimdə iştirak edəcək müəllimlər üçün APTIS diaqnostik testi keçirilib. APTIS ingilis dilinin qiymətləndirilməsi sahəsində ən son tədqiqatlara əsaslanan beynəlxalq səviyyəli ingilis dili təlimidir. NDU-da  Britaniya Konsulluğu təlimçiləri tərəfindən iştirakçılar üçün bir günlük üz-üzə vörkşop təşkil edilib və onlayn formatda başlanıb. Yekunda isə layihəni uğurla başa vuran müəllimlərə sertifikat təqdim ediləcək.

Kifayət Mahmudova
NDU-nun Media və ictimaiyyətlə əlaqələr şöbəsinin müdiri