Alimlər bildiriblər ki, Antarktidada tapılan 69 milyon illik heyvan kəllə sümüyü indiyədək məlum olan ən qədim müasir quşa aiddir. Qitədə tapılan ördək və qazların erkən qohumu sayılan bu quş Təbaşir dövründə məşhur tirannozavr ilə eyni vaxtda Antarktika sahillərində yaşayırdı.

Azturkxeber.az “Reuters” agentliyinə istinadla xəbər verir ki, ABŞ-ın Ohayo Universitetinin professoru və Denver Təbiət və Elm Muzeyinin yer və kosmos elmləri mütəxəssisi Patrik O'Konnor tapıntını elan edərkən deyib: “Bu fosil Antarktidanın müasir quşların təkamülünün ən erkən mərhələləri haqqında bizə çox mətləbləri izah edəcək”.

2011-ci ildən bəri Antarktika yarımadasında həyata keçirilən paleontologiya layihəsi çərçivəsində ekspedisiya zamanı tapılan quş kəllə sümüyü bölgənin müasir ekosistemlərin formalaşmasına necə kömək etdiyini anlamaq baxımından mühümdür. Pittsburqda fəaliyyət göstərən Karnegi Təbiət Tarixi Muzeyinin əməkdaşı Metyu Lamanna deyib: “Antarktida bir çox cəhətdən bəşəriyyətin dinozavrlar dövründə həyatı dərk etməsi üçün son sərhəddir”.

Kəllə sümüyünün özü uzun, uclu dimdiyi və Təbaşir dövrünü əhatə edən Mezozoy erasından əvvəllər kəşf edilmiş bütün məlum quşlar arasında unikal olan beyin formasına malikdir. Tədqiqatçıların dediyinə görə, xüsusiyyətlər Vegavis adlı nəsli kəsilmiş quşa aiddir və bu qanadlı bütün müasir quşların daxil olduğu qrupa daxildir.

Vegavis haqqında ilk dəfə 20 il əvvəl Ostindəki Texas Universitetinin professoru Culia Klark məlumat verib. Onun ördək və qaz kimi müasir su quşlarının erkən təmsilçisi olduğu ehtimal edilir. Lakin Təbaşir dövrünün sonunda – dinozavrların yoxolma hadisəsindən sonra onların da nəsli kəsilib. Bu quşlar indikilərdən fərqli olaraq suyun altında hərəkət etmək üçün ayaqlardan istifadə edirmiş.