Ölkə ərazisində müşahidə olunan qeyri-sabit hava şəraiti ilə əlaqədar “Azərbaycan Dəmir Yolları” QSC (ADY) tərəfindən zəruri qabaqlayıcı təhlükəsizlik tədbirləri həyata keçirilir.

Azturkxeber.az xəbər verir ki, bu barədə ADY-dən məlumat verilib.

Dəmir yolu nəqliyyatında qatarların və sərnişinlərin təhlükəsiz hərəkətinin təmin olunması məqsədilə ölkə üzrə vağzal, stansiya və dayanacaqlarda işçi heyəti fasiləsiz rejimdə çalışır. Platformalarda sürüşmənin qarşısının alınması üçün xüsusi örtüklər salınıb.

Hazırda qatarlar hərəkət qrafikinə uyğun şəkildə fəaliyyətini davam etdirir. Hava şəraiti sabitləşənədək təhlükəsizlik tədbirlərinin davam etdirilməsi nəzərdə tutulur.

ADY sərnişinləri platformalarda hərəkət zamanı diqqətli olmağa, həmçinin dəmiryol xətlərini yalnız müvafiq keçidlərdən keçməyə çağırır.