ABŞ və İran arasında gərginlik yenidən yüksəlir. ABŞ Prezidenti Donald Trampa İranın nüvə və raket proqramlarını zəiflətmək, həmçinin ölkənin Ali Rəhbəri Ayətullah Əli Xameneini təzyiq altında saxlamaq məqsədilə daha geniş hərbi variantlar təqdim olunub.

Azturkxeber.az xəbər verir ki, bu barədə rəsmi mənbələrin məlumatına görə, bu variantlara hava zərbələri, İranın nüvə obyektlərinə qarşı xüsusi əməliyyatlar və hətta komando qüvvələrinin iştirakı ilə hərbi müdaxilələr daxildir. Bununla belə, hələlik yekun qərar qəbul edilməyib. Prezident Trump hərbi əməliyyata icazə verməyib və Ağ Ev diplomatik yolların açıq qaldığını bildirir.

ABŞ rəsmiləri vurğulayırlar ki, ictimaiyyətə açıq şəkildə səsləndirilən sərt bəyanatlar İranı danışıqlar masasına qaytarmaq məqsədi daşıyır.

İran tərəfi isə mümkün hücumlara sərt reaksiya verib. Rəsmi Tehran xəbərdarlıq edib ki, hər hansı hərbi zərbə “ümumi müharibə” kimi qiymətləndiriləcək və buna qətiyyətli cavab veriləcək.

Bu fonda ABŞ Yaxın Şərqdə hərbi mövcudluğunu gücləndirir. Analitiklərin fikrincə, Vaşinqton bu addımla mümkün danışıqlarda üstün mövqe əldə etməyə çalışır.