Ailə, Qadın və Uşaq Problemləri üzrə Dövlət Komitəsinin layihəsi əsasında fəaliyyət göstərən Uşaq Səfirlər Məclisi 2020-ci ildə yaradılıb. Məclisin məqsədi – uşaq hüquqlarının təşviqi, liderlik və ictimai iştirakçılıq bacarıqlarının inkişafı, eləcə də uşaqların fəal vətəndaş kimi yetişməsinə dəstək olmaqdır.

Məclisin 15 üzvü var, regionlarda isə bir qız və bir oğlan olmaqla regional nümayəndələr fəaliyyət göstərir. Onlar öz rayonlarında yerli icra və təhsil orqanları ilə əməkdaşlıq edərək sosial layihələr həyata keçirir, Bakı və rayon fəalları da bu layihələrə qoşulurlar.

“Uşaq Səfirlər Məktəbi” təcrübə proqramı çərçivəsində uşaqlar yay aylarında Kiber Təhlükəsizlik Klubu və Debat Klubu kimi təşəbbüslərdə iştirak edərək, öz bilik və bacarıqlarını daha da inkişaf etdirirlər.

2025-ci ilin ilk 6 ayı ərzində layihənin ümumilikdə 1839 nəfər iştirakçısı olub, 366 tədbir keçirilib və bu tədbirlərdən 12.765 uşaq faydalanıb.

Qeyd edək ki, Məclisə seçim Dövlət Komitəsi tərəfindən müsahibə əsasında həyata keçirilir. Namizədlərin bilik səviyyəsi, sosial bacarıqları, fəallığı və təşəbbüskarlığı qiymətləndirilir.