Azərbaycan Respublikasının İnsan Hüquqları üzrə Müvəkkilinin (Ombudsmanın) Şimal-Qərb Regional Mərkəzi tərəfindən “Konstitusiya və suverenlik ili” ilə əlaqədar Şəki ASAN Xidmət mərkəzində, Şəki rayonunun Baş Kəldək və Oğuz rayonunun Dəymədərə kəndlərində yerli icra və yerli özünüidarəetmə orqanlarının əməkdaşlarının, sakinlərin, ASAN könüllülərinin iştirakı ilə növbəti hüquqi maarifləndirmə tədbirləri keçirilib.

Şimal-Qərb Regional Mərkəzinin rəhbəri Pərviz Məmmədov tədbirlərdə çıxış edərək Azərbaycan Respublikası Prezidentinin 28 dekabr 2024-cü il tarixli Sərəncamı ilə 2025-ci ilin Azərbaycan Respublikasında “Konstitusiya və Suverenlik İli” elan edilməsini diqqətə çatdırıb.

Həmçinin, Azərbaycan Respublikasının Konstitusiyası ilə müəyyən olunmuş əsas insan hüquq və azadlıqları və həmin hüquqların müdafiəsi mexanizmləri, xüsusilə də müstəqil insan hüquqları müdafiə mexanizmi kimi Ombudsman təsisatının fəaliyyət istiqamətləri, habelə Ombudsman haqqında Konstitusiya Qanununa edilmiş son əlavə və dəyişikliklər barədə ətraflı məlumat verib.

Yekunda mövzu üzrə müzakirələr aparılıb, iştirakçıları maraqlandıran suallar ətraflı cavablandırılıb.