Almaniya və Fransa "Eurofighter" - "Rafale" döyüş təyyarələrini əvəzləyəcək beşinci nəsil qırıcıların istehsalı ilə bağlı müzakirələri avqustun sonunadək başa çatdırmaq istəyir.

Bu məsələ ötən gün Almaniya Kansleri Fridrix Merts və Fransa Prezidenti Emmanuel Makron arasında görüşdə də müzakirə olunub.

İspaniyanın da iştirakı ilə üçtərəfli formatda inkişaf etdirilən 100 milyard avroluq beşinci nəsil döyüş təyyarəsi layihəsində müəlliflik hüquqları, ölkələrin istehsal prosesində pay bölgüsü ilə bağlı müzakirələr davam edir. Fridrix Merts və Emmanuel Makronun görüşündə müdafiə nazirlərinə bu istiqamətdə yol xəritəsini hazırlamaq və təklifləri avqustun sonunadək təqdim etmək barədə göstəriş verildiyi bildirilib.

2040-cı ildən etibarən "Rafale" və "Eurofighter" təyyarələrini əvəzləyəcək yeni qırıcıların Fransada "Dassault", Almaniyada "Airbus", İspaniyada "Indra" şirkətləri tərəfindən istehsal olunması nəzərdə tutulur.

Mübahisəli məsələlər arasında Fransanın iş həcminin 80 faizini üzərinə götürmək istəyinə alman müdafiə sənayesi təmsilçilərinin etiraz etməsi, Parisin qırıcıların üçüncü ölkələrə ixracına hər dəfə Almaniyanın razılıq verməsi məsələsinə birmənalı yanaşmaması yer alır.