İnsanların heç vaxt daimi məskunlaşmadığı Antarktida kimi bir qitədə gənc qadının qalıqlarının tapılması olduqca təəccüblüdür. Tədqiqat stansiyası və ya təsadüfi ekspedisiyalar xaricində insanlar Antarktidada heç vaxt məskunlaşmamışdır. Bir vaxtlar qitədə yağış meşələri, bataqlıqlar və dinozavrların yaşadığına dair sübutlar olsa da, qədim insanlar Afrikadan köç edəndə Antarktida müasir avadanlıq olmadan yaşaya bilməyəcək qədər soyuq və kimsəsiz idi.
Maori əfsanələri Polineziya kəşfiyyatçısı Hui Te Rangioranın qitəyə eramızın 7-ci əsrində çatdığını göstərir. Bu əfsanədə o, günəşin görmədiyi dumanlı, qaranlıq bir yerə çatır və buzlu bir mühitlə qarşılaşır. Tədqiqatçılar hesab edirlər ki, bu təsvirlər kəşfiyyatçının Antarktida sularına çatmış və qitəni görmüş ola biləcəyini göstərir. Ancaq Antarktidanın növbəti təsdiqlənmiş mənzərəsi 1820-ci ildə rus tədqiqatçısı Thaddeus von Bellingshausen ekspedisiya zamanı son dərəcə yüksək buzlu sahil gördüyünü təsvir edərkən gəldi. Sonrakı onilliklər və əsrlər ərzində insanlar qitəni kəşf etməyə davam etdilər, bəzən bu prosesdə həyatlarını itirdilər.

Buna görə də 1980-ci illərdə Antarktidada 1819-1825-ci illər arasında öldüyü güman edilən gənc qadına aid insan qalıqlarının tapılması çox təəccüblü idi. Çili Universitetinin Biologiya və Təbiət Elmləri professoru Daniel Torres Navarro məqaləsində yazır: “1985-ci il yanvarın 7-də saat 16:35-də Yamana çimərliyində dəniz qalıqlarını toplayan zaman ilk insan qalıqlarını tapdım: çimərliyin qayalı, qumlu hissəsində yarı basdırılmış kəllə.Yalnız parieto-oksipital hissə görünürdü, frontal, burun və parietal hissələr qumun altında idi. Açıq səthdə mikroyosunların çoxalması səbəbindən yaşılımtıl rəng var idi. Qalıqlar çıxarıldıqda, yaxşı qorunub saxlanılan dişləri olan iki üst çənə parçası da tapıldı.

İlkin müayinələr kəllənin gənc bir şəxsə, çox güman ki, qadına məxsus olduğunu irəli sürdü. Komandanın təhlilinə əsasən, gənc qadının Çilidən gəldiyi və 1819-1825-ci illər arasında öldüyü təxmin edilir. Ehtimallara görə,bu qadın 19-cu əsrdə suiti ovçuları qrupunun bir hissəsi olub və orada tərk edilib. Başqa bir ehtimal odur ki, qadın gəmidə dünyasını dəyişib və o dövrün adətlərinə uyğun olaraq dənizdə dəfn edilib. Bu halda cəsəd axınlar və tufanlar nəticəsində sahilə çıxıb.