Madrid şəhərində keçirilən “FITUR” beynəlxalq turizm sərgisi çərçivəsində Dövlət Turizm Agentliyinin sədri Fuad Nağıyevin rəhbərlik etdiyi Azərbaycan nümayəndə heyəti İspaniyaya səfər edib.

AzTurkxeber.az xəbər verir ki, səfər çərçivəsində Fuad Nağıyev ilə BMT Turizmin Baş katibi Zurab Pololikaşvili arasında Təşkilatın Madriddəki Baş qərargahında keçirilən görüşdə BMT Turizmin Avropa üzrə Regional Komissiyasının 71-ci iclasının 2025-ci ilin 4-6 iyun tarixlərində Azərbaycanda keçirilməsi haqqında müqavilə imzalanıb. Görüşdə, həmçinin Azərbaycanın 2025-2029-cu illər üzrə BMT Turizmin İcraiyyə Şurasına üzvlüyə namizədliyini irəli sürməsi, COP29-da “Turizm günü” çərçivəsində ölkəmizin qoşulduğu Qlazqo Bəyannaməsi üzrə birgə fəaliyyət, təşkilat ilə turizm təhsili sahəsində əməkdaşlığın genişləndirilməsi təşəbbüsü, eləcə də BMT Turizmin “Ən yaxşı turizm kəndi” nominasiyası faylına ölkəmizin müraciəti üzrə müzakirələr aparılıb.

Səfər müddətində Fuad Nağıyev ilə İspaniyanın sənaye və turizm naziri Jordi Hereu arasında görüş baş tutub. Görüşdə F. Nağıyev ölkə turizminin Avropa bazarında təbliğ edilməsi məqsədilə İspaniyada keçirilən “FITUR” və “IBTM World” sərgilərində Azərbaycanın milli stendlərlə təmsil olunması, İspaniya ilə beynəlxalq təşkilatlar çərçivəsində əlaqələrin inkişaf etməsi haqqında məlumat verib, Jordi Hereunu BMT Turizmin Avropa üzrə Regional Komissiyasının Bakıda keçiriləcək 71-ci iclasına dəvət edib. Öz növbəsində iki ölkə arasında turizm sahəsində əməkdaşlıq perspektivlərini qeyd edən J. Hereu əlaqələrin daha da inkişaf etdirilməsinin və qarşılıqlı turist səfərlərinin artırılmasının vacibliyini vurğulayıb.

“FITUR” sərgisi çərçivəsində Azərbaycan pavilyonunda Fuad Nağıyev ilə Braziliyanın turizm naziri Selso Sabino, Andorranın turizm və kommersiya naziri Jordi Torres Falko, eləcə də Özbəkistan Respublikasının Turizm Komitəsinin sədri Umid Şadıyev ilə görüşlər təşkil edilib, müvafiq ölkələrlə mövcud turizm əlaqələri haqqında müzakirələr aparılıb.