Gənclər və İdman Nazirliyi ilə Azərbaycan Su İdman Növləri Federasiyasının birgə təşkilatçılığı ilə keçirilən yelkən idmanı üzrə açıq Azərbaycan çempionatında ikinci yarış günü başa çatıb.

Azturkxeber.az xəbər verir ki, federasiyanın yelkən mərkəzində, Şıxov çimərliyi ərazisində təşkil olunan çempionatda Azərbaycan və Türkiyədən olan idmançılar Optimist və ILCA4 sinifləri üzrə mübarizələrini davam etdiriblər.

İkinci yarış günü ərzində iştirakçılar küləyin istiqaməti və sürətindən asılı olaraq müəyyən edilmiş marşrut üzrə bir neçə yürüşdə (reysdə) güclərini sınayıblar. Hər yürüşün nəticələri ayrıca qiymətləndirilib və idmançıların yekun sıralamadakı mövqeləri topladıqları xallar əsasında müəyyənləşdirilir. Daha az xal toplayan idmançı daha yüksək mövqe tutur.

Çempionatın yekun nəticələri bütün yarış günlərində keçirilən yürüşlərin nəticələri nəzərə alınmaqla hesablanacaq. Sabah, sentyabrın 14-də final yürüşləri keçiriləcək və bundan sonra siniflər üzrə qaliblər müəyyənləşəcək.

Çempionatın mükafatlandırma mərasimi sentyabrın 14-də saat 18:00-da keçiriləcək. Qaliblər diplom və medallarla təltif olunacaqlar. Həmçinin bütün iştirakçılara Azərbaycan Su İdman Növləri Federasiyası tərəfindən sertifikatlar təqdim ediləcək.

Qeyd edək ki, açıq Azərbaycan çempionatında Azərbaycanla yanaşı, Türkiyədən gələn 10 nəfərlik heyət də iştirak edir.