Yeni Azərbaycan Partiyasının (YAP) Mərkəzi Aparatı və partiyanın Naxçıvan şəhər təşkilatının birgə təşkilatçılığı ilə “Şəhərsalma və Memarlıq İli” çərçivəsində Gəncə İdman Sarayında keçirilən “Heydər Əliyev məktəbi” layihəsinin beşinci günündə gənc fəallarla “Memar Əcəmi irsi: milli memarlıq üslubunun formalaşması və inkişafı” mövzusunda görüş keçirilib.

Azturkxeber.az xəbər verir ki, əvvəlcə Ümummilli Lider Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.

Görüşdə çıxış edən YAP Naxçıvan şəhər təşkilatının sədri Elman Cəfərli, “Səs” qəzetinin baş redaktoru Bəhruz Quliyev, AMEA-nın müxbir üzvü, professor İbrahim Cəfərov Azərbaycan memarlığının zəngin tarixi ənənələrindən, dahi memar Əcəmi Naxçıvaninin yaradıcılıq irsindən və onun milli memarlıq üslubunun formalaşmasındakı müstəsna rolundan bəhs ediblər. Qeyd olunub ki, Naxçıvan memarlıq məktəbinin banisi Əcəmi Əbubəkr oğlunun yaratdığı memarlıq nümunələri dünya şəhərsalma mədəniyyətinin qiymətli inciləri sırasında yer alır.

Çıxışlarda vurğulanıb ki, Ümummilli Lider Heydər Əliyev milli-mənəvi irsimizin, mədəni sərvətlərimizin və tarixi memarlıq abidələrinin qorunmasına və bərpasına daim xüsusi diqqət göstərib. Bu siyasət bu gün Prezident İlham Əliyev və Birinci vitse-prezident Mehriban Əliyevanın rəhbərliyi ilə uğurla davam etdirilir.

Bildirilib ki, məqsədyönlü dövlət siyasəti nəticəsində Azərbaycanın zəngin tarixi-memarlıq irsi beynəlxalq səviyyədə geniş təbliğ olunur. Xüsusilə işğaldan azad edilmiş ərazilərdə aparılan bərpa və yenidənqurma işlərində milli memarlıq ənənələri müasir şəhərsalma prinsipləri ilə uzlaşdırılır.

Natiqlər Memar Əcəminin formalaşdırdığı bədii-estetik prinsiplərin gənc nəslin milli kimlik, vətənpərvərlik və tarixi-mədəni irsə bağlılıq ruhunda yetişməsində mühüm əhəmiyyət daşıdığını diqqətə çatdırıblar.

Görüşdə gənc fəallardan İbrahim Cəfərov, Adil Əhmədov, Gülnar Əlizadə, Altay Cəfərli, Emil Vəliyev və digərləri mövzu ilə bağlı fikirlərini bölüşüblər.

Sonra iştirakçıların sualları cavablandırılıb.

Tədbir Yeni Azərbaycan Partiyasının Himninin səsləndirilməsi ilə başa çatıb.

Daha sonra layihə iştirakçıları Azərbaycanın füsunkar təbiət incilərindən biri olan Göygöl Milli Parkını ziyarət ediblər. Burada onlara Göygölün yaranma tarixi, nadir flora və fauna növləri, biomüxtəlifliyin qorunması istiqamətində həyata keçirilən tədbirlər, eləcə də ekoloji maarifləndirmənin əhəmiyyəti barədə ətraflı məlumat verilib.

Ekskursiya Heydər Əliyev Park Kompleksində yerləşən Zəfər tağı ilə tanışlıqla davam edib. İştirakçılara abidənin inşa tarixi, memarlıq xüsusiyyətləri, eləcə də milli memarlıq elementləri ilə müasir üslubun vəhdəti haqqında ətraflı məlumat verilib. Qeyd olunub ki, Zəfər tağı xalqımızın birliyini, Vətən uğrunda canından keçmiş şəhidlərin əziz xatirəsini və Azərbaycan Ordusunun qəhrəmanlığını özündə əks etdirən mühüm memarlıq nümunələrindən biridir.

Günün sonunda YAP İdarə Heyətinin üzvü, partiyanın Gəncə şəhər təşkilatının sədri Bayram Aslanov, YAP Naxçıvan şəhər təşkilatının sədri Elman Cəfərli və YAP Mərkəzi Aparatının Təşkilat şöbəsinin baş məsləhətçisi Araz Salmanov gənclərlə görüşərək fikir mübadiləsi aparıblar.