Gündəlik “Göteborgs-Posten” qəzetində isveçli aviasiya eksperti Yan Olssonun müsahibəsi dərc edilib, burada o, “Azərbaycan Hava Yolları” QSC-yə (AZAL) məxsus təyyarənin qəzaya uğraması ilə bağlı fikirlərini bildirir.

Yan Olsson milli “TT” agentliyinə verdiyi müsahibəsində vurğulayıb ki, gövdədəki dəliklər təyyarənin atəşə tutulduğundan xəbər verir.

“Təyyarə atəşə tutulub, bu, tamamilə açıq-aydındır”, - deyə o bildirib.

İsveçli ekspert qəzaya Rusiyanın hava hücumundan müdafiəsinin səbəb olduğunu iddia edir.

“Gövdədəki dəliklərə, çox güman ki, zenit raketi səbəb olub, çünki onlar içəriyə doğru əyilib və bu, xarici təsirə işarə edir”, - deyə Yan Olsson izah edib.

Ekspertin fikrincə, hidravlik sistem zədələnə bilərdi, bu da təyyarənin idarəetməsinin itirilməsinə gətirib çıxarıb.

“Şəkillərdə görünür ki, bir yerdə zərbə olub və lyuk tamamilə açıqdır. Yəqin ki, bütün hidravlik maye itirilib”, - deyə o dəqiqləşdirib.