“Qış fasiləsi az olduğuna görə, komanda hazırlığı Bakıda keçdi. Toplanış müddətində iki yoxlama matçında gücümüzü sınadıq və heyətin bütün üzvlərinə oynamaq imkanı yaratdıq”.

Bu sözləri AZƏRTAC-a açıqlamasında “Araz-Naxçıvan” klubunun baş məşqçisi Elmar Baxşıyev komandasının qış toplanışını dəyərləndirərkən deyib.

Mütəxəssis bildirib ki, futbolçulardan istədiyini tam olaraq ala bilməyib.

“Fasilə zamanı komanda hazırlığını heç vaxt 100 faizə çatdıra bilməz. Amma tədricən optimal formamıza çatacağıq. Ümumi götürsək, futbolçuların işə yanaşmasından, istirahətdən sonra düşərgəyə normal çəkidə dönmələrindən razıyam. Qış fasiləsindən sonrakı dövr daha çətin keçəcək. Çünki komandalar heyətlərinə əl gəzdirməklə zəif mövqelərini gücləndirməyə çalışıblar. Məqsəd mümkün qədər yuxarı pillələrdə qərarlaşmaqdır. Bunun üçün də hər həftə keçirəcəyimiz oyunlara köklənməli, addım-addım buna nail olmalıyıq”, - deyə baş məşqçi vurğulayıb.

Təcrübəli çalışdırıcı bəzi futbolçuları nəzərdən keçirdiklərini söyləyib: “Hələlik ortaq məxrəcə gəldiyimiz oyunçu yoxdur. Transfer xatirinə də addım atmaq istəmirik. Elə futbolçu gətirməliyik ki, bizə kömək edə bilsin, atmosferi pozmasın. Gücləndirmək istədiyimiz mövqe hücum xəttidir”.

E. Baxşıyevin sözlərinə görə, komandada razı qalmadığı məqamlar var: “Ancaq bunu ictimai müzakirəyə çıxarmaq olmaz. Biz də ona görə burdayıq ki, çatışmazlıqları aradan qaldıraq. Kollektiv işində nöqsan hər zaman olur, olacaq da. Heç kim səhv etməkdən sığortalanmayıb. Çalışacağıq ki, səhvlərimizi minumuma endirək”.

Qeyd edək ki, “Araz-Naxçıvan” hazırda turnir cədvəlində 39 xalla 2-ci yerdə qərarlaşıb.