Sentyabrda İsveçrədən ABŞ-a saat ixracı 55,6 faiz azalıb.

Bu barədə İsveçrənin Saatçılar Federasiyası məlumat verib.

Avqustda isə ixrac 23,9 faiz azalmışdı. Səbəb Vaşinqtonun avqustdan etibarən İsveçrədən saat idxalına 39 faiz əlavə rüsum tətbiq etməsidir.

Yeni rüsumlar qüvvəyə minməzdən əvvəl isveçrəli saat istehsalçıları ABŞ-da çox böyük ehtiyat yaratmağa nail olublar. Apreldə okeanın o tayına ixrac 149 faiz artmışdı.

Sentyabrda İsveçrədən Britaniyaya, Çinə, Sinqapura və Koreyaya saat ixracı hiss olunacaq qədər artıb. Almaniya, Fransa və İtaliyaya ixracat isə geriləyib.

Ümumilikdə sentyabrda konfederasiyadan 2 milyard frank (4,2 milyard AZN) dəyərində saat ixrac edilib ki, bu da aylıq əsasda 3,1 faiz artım deməkdir.