Prezidentin kəndimizə, evimizə gəlməsi bizim üçün böyük sevinc oldu. Bundan gözəl təəssürat ola bilməz. Bizi doğma torpaqlara qovuşdurduğuna, qayğımıza qaldığına, gözəl mənzillə təmin etdiyinə görə dövlətimizin başçısına təşəkkürümü bildirirəm.

Bu sözləri AZƏRTAC-ın bölgə müxbirinə Xocalının Badara kəndinin sakini Barat Novruzov deyib.

“Xocalı faciəsi zamanı beş nəfər ailə üzvümü itirmişəm. Atam, anam, iki bacım və polis qardaşım həlak olub. Özüm də yaralanaraq əsir düşmüşdüm. Əsirlik dövründə məni Ruben adlı erməninin qəbri üstündə öldürmək istəyirdilər. Yolda özümü qayadan ataraq sağ qaldım”, - deyən B.Novruzov artıq o günlərin arxada qaldığını, 33 ildən sonra doğma torpaqlarına qovuşmağın sevincini yaşadığını söyləyib.

“Allah şəhidlərimizə rəhmət eləsin, qazilərimizə cansağlığı versin. Ulu Tanrı Ali Baş Komandanımıza uzun ömür versin. Onun apardığı xarici və daxili siyasət nəticəsində biz doğma torpaqlarımıza qayıtmışıq. Bizim üçün burada gözəl şərait yaradılıb”, - deyə o bildirib.