Naxçıvan Dövlət Universitetinin nümayəndə heyəti Türkiyənin ən nüfuzlu ali təhsil ocaqlarından biri olan İstanbul Universiteti-Cərrahpaşada olub.

Universitetin Media və ictimaiyyətlə əlaqələr şöbəsindən bildirilib ki, görüşdə hər iki universitetin nümayəndə heyətləri iştirak ediblər.

Səfər çərçivəsində iki universitet arasında qarşılıqlı əməkdaşlıq imkanları müzakirə olunub.

Görüşdə ikili diplom proqramlarının icrası, tələbə mobilliyi, tələbələrin müxtəlif təcrübə proqramlarına cəlb edilməsi məsələləri diqqətdə saxlanılıb. Eləcə də birgə elmi-tədqiqat layihələrinin hazırlanması və icrası ilə bağlı təkliflər irəli sürülüb.

Görüş zamanı İstanbul Universiteti-Cərrahpaşanın professor-müəllim heyətinin NDU-da tədris və elmi-tədqiqat işlərinə cəlb olunması üçün danışıqlar aparılıb. Qarşılıqlı əməkdaşlıq hər iki universitetin beynəlxalq əlaqələrinin möhkəmləndirilməsinə, tədrisin keyfiyyətinin yüksəldilməsinə və tələbələr üçün daha geniş imkanların yaradılmasına hədəflənib.

Qeyd edək ki, elmi-tədqiqat sahəsində fərqlənən, xüsusən Tibb fakültəsinin uğurları ilə dünya miqyasında tanınan İstanbul Universiteti-Cərrahpaşa beynəlxalq elmi əməkdaşlıqlarda aparıcı mövqeyə malikdir.