Dekabrın 9-da Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov “Parlamentarizm: ənənələr və perspektivlər” mövzusunda beynəlxalq parlament konfransında iştirak etmək üçün ölkəmizdə səfərdə olan Malayziya Nümayəndələr Palatasının Beynəlxalq əlaqələr və ticarət komitəsinin sədri Vonq Çen ilə görüşüb.
Söhbət zamanı Milli Məclisdə keçirilən beynəlxalq parlament konfransı çərçivəsində müzakirə olunan məsələlər, Azərbaycan və Malayziya arasında parlamentlərarası əlaqələrin inkişaf potensialı barədə müzakirələr aparılıb. 
Görüşdə Malayziya parlamentinin deputatı dünən Azərbaycanın işğaldan azad olunmuş Füzuli, Şuşa, Xankəndi və Xocalı şəhərlərinə səfəri barədə təəssüratlarını bölüşüb, görülmüş işlərin miqyasından danışıb. Söhbət zamanı Vonq Çenin orada gedən tikinti-quruculuq işləri, mina probleminin insanların öz doğma yurdlarına qayıtmasına törətdiyi maneələr barədə sualları cavablandırılıb.
Səməd Seyidov qonağa Azərbaycan və Ermənistan arasında sülh prosesinin gedişi, bu sahədə görülmüş və qarşıda dayanan işlər barədə məlumat verib.
Görüşdə parlamentlərarası əlaqələrin inkişafında dostluq qruplarının rolu, Azərbaycanın yaşıl enerji sahəsindəki resursları və bu istiqamətdə həyata keçirdiyi layihələr barədə də müzakirələr aparılıb.

Milli Məclisin Mətbuat və 
ictimaiyyətlə əlaqələr şöbəsi