Dekabrın 15-də Müslüm Maqomayev adına Azərbaycan Dövlət Akademik Filarmoniyasında görkəmli bəstəkar, pianoçu, caz-muğam janrının banisi, Əməkdar incəsənət xadimi, Dövlət mükafatı laureatı Vaqif Mustafazadənin vəfatının 45 illiyinə həsr olunmuş xatirə konserti keçiriləcək. 

 V.Mustafazadə adına Xeyriyyə Fondundan AZƏRPRESS Media Group-a verilən məlumata görə, Mədəniyyət Nazirliyi və Paşa Bankın dəstəyi ilə sənətkarın adını daşıyan xeyriyyə fondu tərəfindən təşkil ediləcək “Maestroya sevgi ilə” adlı konsertdə Xalq artisti Salman Qəmbərov və Bakustic Jazz, Əməkdar artistlər Emil Əfrasiyab, Şahin Növrəsli, İsfar Sarabski, Ruslan Hüseynov, həmçinin Moskva Dövlət Akademik Filarmoniyasının solisti Riad Məmmədov, dünya şöhrətli rusiyalı caz ifaçı Yakov Okun öz əsrarəngiz ifaları ilə çıxış edəcəklər. Proqramda əsasən V.Mustafazadənin əsərləri səslənəcək. 

Dünya şöhrətli Azərbaycan pianoçusu, virtuoz caz əfsanəsi Vaqif Mustafazadə Azərbaycan caz musiqisinin banisi və yeni caz fikrinin təsisçisidir. O, dərin köklərə malik qədim Azərbaycan muğamı ilə ənənəvi klassik Amerika caz musiqisini uğurla sintez edərək, dünya musiqi inciləri xəzinəsinə caz-muğamın təkrarolunmaz nümunələrini bəxş edib. Onun musiqi stili "Caz-Muğam" adlanır. O, eyni zamanda fortepiano və simfonik orkestr üçün konsertin, tamamlanmamış "Muğam" simfoniyasının bir sıra caz kompozisiyalarının və pyeslərin müəllifi olub. 1977-ci ildə Donetskdə keçirilən caz festivalında, 1978-ci ildə isə Tbilisidə caz festivalda laureat adına və ən yaxşı pianoçu mükafatına layiq görülüb. 1979-cu ildə “Əzizəni gözləyərkən” kompozisiyası ilə Monakoda Beynəlxalq caz kompozisiyaları müsabiqəsində ən yaxşı bəstəkar kimi “Ağ royal” Qran-Pri mükafatının sahibi olub. Elə həmin il Azərbaycan Respublikasının Əməkdar artisti fəxri adına layiq görülüb. V.Mustafazadənin musiqimizdə etdiyi yeniliklər bu gün də aktualdır və bir çox musiqiçilər ifalarında onun yaratdığı caz-muğam sintezindən istifadə edirlər. O, XX əsrin görkəmli caz pianoçularından biri və bəstəkar olmaqla yanaşı, yaradıcılığı dövründə “Orero” ansamblına, “Qafqaz” caz üçlüyünə, “Leyli” və ”Sevil” qadın vokal-instrumental, həmçinin “Muğam” instrumental ansambllarına rəhbərlik edib. Bu gün Vaqif Mustafazadənin yolunu qızı Əzizə Mustafazadə böyük uğurlarla davam etdirir. Ə.Mustafazadə hazırda bəstəkarın mədəni irsini dünya səviyyəsində layiqincə təbliğ edir. O, 1997-ci ildə İngiltərə Kraliçasının klubunda konsert proqramı ilə çıxış edib və Kraliça ona "Cazın şahzadəsi" adını verib. Hazırda dünyada Əzizə Mustafazadəni hamı bu adla tanıyır. İllər keçsə də Vaqif Mustafazadə və onun sənəti bugünkü kimi sevilərək, sənət adamlarının tədqiqat mövzusu olacaq. Hər il silsilə tədbirlərlə xatirəsi anılan dünya şöhrətli caz ifaçısı Vaqif Mustafazadə bu dəfəki xatirə gecəsində də musiqisevərlər tərəfindən böyük ehtiramla yad ediləcək.

Qeyd edək ki, saat 19:00-dan 20:30-dək davam edəcək xatirə konsertinə biletləri iTicket.az saytı və şəhərin kassalarından əldə etmək mümkündür.