Maya dili mütəxəssisləri ötən il aşkar edilmiş daş kitabədə əvvəllər məlum olmayan güclü Maya kraliçasının adını deşifrə ediblər.Çoxəsrlik daşların üzərindəki heroqlif yazıları deşifrə edən tədqiqatçılar əvvəllər məlum olmayan Maya kraliçasının adını müəyyən ediblər. İx Chak Cheen kimi tanınan bu hökmdar 6-cı əsrdə Meksikanın Yukatan yarımadasındakı Kobanı - "dalğalı sular şəhəri"ni idarə edib.

Koba Maya dünyasının əsas şəhər mərkəzi kimi təxminən eramızdan əvvəl 350-ci ildən 14-cü əsrə qədər məskunlaşmışdır. O, minlərlə yaşayış binası, çoxsaylı ağ daş yolları və bir neçə piramida ilə birlikdə dörd gölün ətrafında təşkil edilmiş elit yaşayış məskənləri ilə tanınıb.

2024-cü ildə INAH-dan (Meksika Milli Antropologiya və Tarix İnstitutu) arxeoloqlar Kobada daş pilləkənin içinə həkk olunmuş geniş heroqlif mətni aşkar edərək ona “Əsas Qaya” adını veriblər. Eroziya təməl qayasını ciddi şəkildə zədələyib və 123 heroqlif panelin tərcüməsini çətinləşdirib. Lakin əlavə tapıntılar, o cümlədən 23 stela mütəxəssislərə mətnləri şərh etməyə kömək edəcək ipuçları verib.