Yollarda müşahidə olunan ən təhlükəli hallardan biri piyadaların yol hərəkəti qaydalarına laqeyd yanaşmasıdır. Bəzən insanlar yaxınlıqda yeraltı və ya yerüstü piyada keçidi olduğu halda, sədləri aşaraq və ya yolun hərəkət hissəsinə çıxaraq öz həyatlarını təhlükəyə atırlar. Bir anlıq tələskənlik, diqqətsizlik və ya səhlənkarlıq bir çox hallarda faciəvi nəticə ilə bitir. Aparılmış araşdırmalar göstərir ki, piyada vurulması ilə nəticələnən hadisələrin 90 faizdən çoxu məhz piyada keçidlərindən kənarda baş verir. Bu fakt bir daha göstərir ki, qaydalara əməl etmək sadəcə tövsiyə deyil, həyatın qorunması üçün zəruri şərtdir.

Bu barədə Daxili İşlər Nazirliyinin Baş Dövlət Yol Polisi İdarəsinin (BDYPİ) piyadalara ünvanlanan növbəti müraciətində bildirilib.

Qeyd edilib ki, əgər piyadanın qayda pozuntusu törətməsi nəticəsində yol-nəqliyyat hadisəsi baş verərsə və bu hadisə insanın xəsarət almasına və ya ölümünə səbəb olarsa, bu, artıq cinayət məsuliyyəti yaradır.

BDYPİ qarşıdan gələn payız-qış mövsümünü nəzərə alaraq bir daha piyadalara müraciət edərək, onlara

yolu yalnız piyada keçidlərindən keçməyi, görünmə məhdud olduğu şəraitdə və qaranlıq vaxtı diqqətli olmağı, parlaq geyimlər geyinməyi, yaxınlaşan avtomobillərin səsini eşitmək üçün qulaqlıqdan istifadə etməməyi tövsiyə edib.

“Unutmayın, qaydalara əməl etmək sizin və ətrafınızdakı insanların həyatının təminatıdır”,- deyə müraciətdə vurğulanıb.