Ukraynanın Odessa şəhər meri Qennadi Truxanov Azərbaycan diasporunun fəalları ilə görüşüb.

Truxanov sosial media səhifəsində yaydığı məlumatda görüş zamanı Odessada Azərbaycan mədəniyyətinin elementlərini özündə əks etdirən park konsepsiyasının müzakirə olunduğunu bildirib.

“Bolşoy Fontan”ın 4-cü stansiyasında 2 hektardan çox yaşıllıq sahəsində salınacaq “Azərbaycan” parkı müasir ictimai məkan olacaq. Azərbaycan diasporunun nümayəndələri ilə birlikdə layihənin konsepsiyasını, həyata keçirilmə mərhələlərini və maliyyə mənbələrini müzakirə etdik”, - deyə mer əlavə edib.

Görüşdə soydaşlarımız adından danışan “Birlik” təşkilatının sədri vəzifəsini icra edən Cəlil Astanov bildirib ki, “Azərbaycan” parkı odessalılara gözəl hədiyyə olacaq.

Görüşdən sonra Qennadi Truxanov və Azərbaycanın diaspor fəalları gələcək parkın yerinə gediblər. “Bu, icma, biznes və hökumət arasında real qarşılıqlı əlaqənin nümunəsidir. Odessanın çoxmillətli birlik və qələbə şəhəri olduğunun daha bir sübutudur”, - deyə mer əlavə edib.