Şimali Makedoniyada ən böyük külək elektrik stansiyasının (KES) təməli qoyulub.

Baş nazir Kristian Miskoski stansiyanın ölkənin indiyədək ən böyük bərpa olunan enerji layihəsi olduğunu deyib.

Bildirilib ki, Stip şəhəri yaxınlığındakı stansiya 400 meqavat elektrik enerjisi istehsal edəcək. Burada 55 külək turbini quraşdırılacaq, layihənin dəyəri isə 430 milyon avrodur. KES ölkədəki 580 min ev təsərrüfatından 100 minini elektrik enerjisi ilə təmin edəcək.

Şimali Makedoniya 2027-ci ilədək kömür elektrik stansiyalarını mərhələli şəkildə dayandırmağı və Avropa İttifaqının bərpa olunan enerji məqsədləri ilə uyğunlaşmağı öhdəsinə götürüb. Bu layihə ölkənin bərpa olunan enerjiyə keçidi istiqamətində mühüm addım kimi qiymətləndirilir. Şimali Makedoniya ümumi elektrik enerjisi istehlakının təxminən 30 faizini idxal olunan enerji hesabına ödəyir.