Belçikanın Boom şəhərində iyulun 18-də başlaması nəzərdə tutulan məşhur “Tomorrowland” festivalının ərazisində güclü yanğın baş verib.

Yanğın nəticəsində əsas səhnənin dörddəüç hissəsi yanıb.

Yanğınsöndürənlər alovun ətrafdakı çadırlara və bitki örtüyünə yayılmasının qarşısının alınması üçün fasiləsiz tədbirlər görürlər. Polis gücləndirilmiş iş rejimində fəaliyyət göstərir.

Hadisə nəticəsində xəsarət alanların olmadığı bildirilir. Yanğına səhnədə sınaqlar zamanı atılan fişənglərin qığılcımlarının səbəb ola biləcəyi ehtimal edilir.

Qeyd edək ki, “Tomorrowland” elektron musiqi festivalı hər il iyulun son iki həftəsonu keçirilir. Ötən il festivala 400 min tamaşaçı qatılmışdı. Builki festivalda Armin van Büren, Erik Pridz, Şarlotte De Uitte, Afrojack, Boris Brejcha, David Guetta, Robin Schulz və Deadmau5 kimi məşhur ifaçıların çıxışları planlaşdırılırdı.

Hazırda festivalın keçirilib-keçirilməyəcəyi məlum deyil. Təşkilatçılar “Tomorrowland”ın ləğv edilməsi barədə yayılan saxta məlumatlar barədə xəbərdarlıq edib və bu məlumatların doğru olmadığını bildiriblər.

Festivalda çıxış etməli olan tanınmış DJ-lər yanğınla bağlı paylaşımlar edib, “Tomorrowland”ın baş tutacağına ümidvar olduqlarını ifadə ediblər.