Zaqatalanın Tala çayında azyaşlı qız uşağı boğulub.

Hadisə rayonun Meşleş kəndinə yaxın ərazidə, ailəsi ilə istirahətə gedən Yuxarı Tala kənd sakini Əfəndi İsmayılov çayın dağlara yaxın hissəsində olarkən baş verib. Belə ki, 2 yaşlı Səfiyyə valideynlərinin diqqətindən yayınaraq suya düşüb və gur sulu Tala çayının axınında itib.

Uşaq çay axarından bir qədər uzaqda tapılıb. Hadisə yerinə cəlb edilən təcili tibbi yardım briqadasının həkimləri tərəfindən müayinə zamanı uşaqda heç bir həyat əlaməti olmayıb.

Yaxınlarının təkidi ilə azyaşlı Rayon Mərkəzi Xəstəxanasına çatdırılıb və bütün tibbi müdaxilələr həyata keçirilib. Lakin xəstəxanaya kimi ölüm faktı təsdiqini tapıb.

Baş vermiş hadisə ilə bağlı TƏBİB-dən də münasibət bildirilib. “Saat 17:05 radələrində 2023-cü il təvəllüdlü azyaşlı (qadın cinsi) suda boğulma səbəbilə Zaqatala Rayon Mərkəzi Xəstəxanasının Təcili tibbi yardım şöbəsinə gətirilib.

Şəxsin xəstəxanaya qədər ölüm faktı qeydə alınıb. Ailə üzvlərinin təkidi ilə azyaşlıya reanimasiya tədbirləri icra edilsə də, ölüm faktı təsdiqlənib”, - deyə bildirilib.

Faktla bağlı Zaqatala rayon prokurorluğunda araşdırma başlanıb.