Ulf Kristersson hökumətinin nazirlərindən birinin yaxın qohumu ifrat sağçı və nasist təşkilatlarının fəaliyyətində fəal iştirak edib.

Bu barədə İsveçin “Expo” nəşri araşdırma aparıb. Söhbət onun Aktivklubb Sverige (Aktiv İsveç klubu) və Det fria Sverige (Azad İsveç) təşkilatları ilə əlaqələrindən, həmçinin sosial şəbəkələrdəki anonim hesablar vasitəsilə yeni üzvləri cəlb etmək cəhdlərindən gedir.

Həmin şəxs neonasist “Nordiska motståndsrörelsen” (Şimal Müqavimət) hərəkatının fəalları ilə qarşılıqlı əlaqədə olub, yaşadığı ərazidə irqçi materiallar yerləşdirib və zorakılıq ideologiyaları ilə bağlı icmalarda fəallıq göstərib. Bildirilib ki, İsveç Təhlükəsizlik Xidmətinin (Säpo), istintaqın materialından əvvəl onun əlaqələri barədə məlumatı olmayıb. “Säpo” əməkdaşları qorunan şəxslərlə bağlı məxfiliyi əsas gətirərək təfərrüatlarla bağlı açıqlama verməkdən imtina ediblər.

“Expo” müvafiq nazirin qərargahına suallar göndərdikdən sonra qohumun hesabları silinib, məxfilik parametrləri isə dəyişdirilib. Bununla belə, araşdırma aparan jurnalist Erik Qlaad vurğulayır ki, əsas problem hələ də qalır - hökumətin milli təhlükəsizlik maraqları naminə necə hərəkət etməsi.

Ədliyyə naziri Gunnar Strömmer vəziyyətin təhlükəsizliyə təhdid olub-olmaması ilə bağlı şərh verməkdən imtina edib və hökumətin nə vaxt məlumatlandırıldığını dəqiqləşdirməyib. O, həmçinin nazirin hələ də vəzifəsində olub-olmaması ilə bağlı sualı cavablandırmayıb.

Ekspertlər xəbərdarlıq edirlər ki, hətta Aktivklubb Sverige kimi qeyri-rəsmi ifrat sağçı qruplar da zəif daxili nəzarət və ayrı-ayrı iştirakçıların yüksək dərəcədə radikallaşması səbəbindən təhlükəli ola bilər. Onların fikrincə, bu cür qruplar məqsədləri aydın olmayan, lakin ümumi ekstremist baxışları olan sosial şəbəkələr kimi fəaliyyət göstərirlər.