Böyük Britaniyanın Müdafiə Nazirliyi döyüş meydanında qərarların daha sürətli verilməsi üçün yeni texnologiyaların hazırlanmasına bir milyard funt-sterlinqdən çox vəsait sərf edəcək.

Hökumət 2027-ci ilin aprelindən etibarən müdafiə xərclərini ÜDM-in 2,5 faizinə, növbəti parlament müddətində isə bu göstəricini 3 faizə çatdırmağı hədəfləyir. Baş nazir fevral ayında bildirmişdi ki, bu artımı maliyyələşdirmək üçün xarici yardım büdcəsində ixtisarlar ediləcək.

Müdafiə Nazirliyi yeni texnologiyaların açıqlanması zamanı bildirib ki, “Rəqəmsal Hədəfləmə Şəbəkəsi” adlı sistem əsgərləri peyklər, təyyarələr və dronlar vasitəsilə təmin edilən əsas məlumatlarla daha effektiv şəkildə əlaqələndirəcək və düşmən hədəflərinin daha tez müəyyənləşdirilib məhv edilməsinə kömək edəcək. Müdafiə naziri Con Hili bəyan edib ki, bu texnologiya süni intellekt və proqram təminatından istifadə etməklə hazırlanacaq.

Bu baxış Leyboristlər hökuməti tərəfindən sifariş edilib və Con Hili onu öz növündə birinci adlandırıb. Baxışın nəticələrinin 2025-ci ilin birinci yarısında dərc olunacağı gözlənilir.

Rəsmi şəxslərin sözlərinə görə, son iki il ərzində Britaniya ordusu potensial düşmənlər tərəfindən 90 minə yaxın kibertəhdidlə üzləşib və bu hücumlar həm say, həm də mürəkkəblik baxımından artmaqda davam edir.