Yay aylarında su ilə təmas artdıqca insanların barmaq dərisində müşahidə edilən qırışların səbəbi və bu qırışların təkrarlanma üsulu elmi maraq obyektinə çevrilib. Nyu-York Dövlət Universitetinin Bioloji Yumşaq Maddə Mexanikası Laboratoriyasında aparılan tədqiqat bu fenomenin altında yatan mexanizmləri açıqlığa çıxarır.

Tədqiqat qrupu professor Gi Germanın rəhbərliyi ilə barmaq qırışlarının təkcə dəri şişməsi nəticəsində deyil, dərialtı qan damarlarının yerləşməsindən də irəli gəldiyini müəyyənləşdirib. Qrupun əvvəlki tədqiqatları bu istiqamətdə əsas ehtimalları vermişdi. Sonrakı araşdırmalar qırışların hər dəfə eyni naxışda əmələ gəlib-gəlmədiyini öyrənməyə yönəlib. Bu məqsədlə aparılan təcrübədə iştirakçılar barmaqlarını 30 dəqiqə ərzində suya batırıb, sonra yaranan qırışların şəkli çəkilib və 24 saat sonra eyni proses təkrar edilib. Nəticələr göstərib ki, qırış naxışları hər iki halda demək olar ki, tam eyni olub. Dr. German bildirir ki, qan damarları öz mövqelərini çox dəyişmir, onlar nisbi olaraq sabitdir və bu da qırışların eyni formada təkrarlanmasına səbəb olur.

Tədqiqat zamanı əlavə maraqlı bir kəşf də edilib. Belə ki, barmaqlarında median sinir zədəsi olan şəxslərdə suya məruz qaldıqda qırış əmələ gəlmir. Bu müşahidə sinir sisteminin bu prosesdə oynadığı rolu göstərməkdədir və nevroloji diaqnostika üçün yeni istiqamətlər aça bilər. Tədqiqatın nəticələri “Journal of the Mechanical Behavior of Biomedical Materials” jurnalında dərc olunub və barmaq izlərinin identifikasiyası, eləcə də suyun təsirinə məruz qalan meyitlərin məhkəmə ekspertizası kimi sahələrdə tətbiq oluna biləcəyi düşünülür.

Keçmiş polis əməkdaşı olan professor bu mövzunun böyük potensialını xüsusi vurğulayıb. Hazırda German və komandası dəri elmi sahəsində tədqiqatlarını davam etdirir.