Alimlər təqribən 14.300 il əvvəl baş vermiş kosmik hadisənin indiyə qədər aşkar edilmiş ən güclü günəş fırtınası olduğunu müəyyən ediblər.

Finlandiyanın Oulu Universitetinin tədqiqatçıları ağac halqaları və buz təbəqələrinin təhlili nəticəsində eramızdan əvvəl 12350-ci ildə böyük bir geomaqnit qasırğasının baş verdiyini müəyyən ediblər.

SOCOL:14C-Ex adlı xüsusi iqlim modelinin apardığı hesablamalara görə, hadisə müasir peyk dövrünün ən güclü günəş fırtınasından 500 dəfə güclü olub.

Günəşdən gələn yüklü hissəciklər atmosferlə toqquşaraq karbon-14 səviyyəsinin qəfil artmasına səbəb olur. Bu izlər ağac halqaları sayəsində minlərlə il əvvələ qədər izlənilə bilər.

Mütəxəssislər bu hadisənin indiyə qədər məlum olan ən böyük günəş hissəcikləri qasırğası olduğunu və gələcəkdə oxşar hadisələrin infrastruktur sistemlərinə ciddi təsir göstərə biləcəyini vurğulayırlar.

Tədqiqat “Earth and Planetary Science Letters” jurnalında dərc olunub.