Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) Amerika Birləşmiş Ştatlarında (ABŞ) keçirilən “Global Tech Awards 2025” beynəlxalq müsabiqəsində 3 nominasiya üzrə qalib seçilib.

Nazirliyin İctimaiyyətlə əlaqələr şöbəsindən verilən məlumata görə, xidmətin “Əmək və Məşğulluq” altsistemi (ƏMAS) üzərindən göstərdiyi xidmətlər və bu istiqamətdəki innovativ addımları müsabiqənin tədqiqat komandası tərəfindən yüksək qiymətləndirilib.

DƏMX "Green Technology", "Government Technology" və "HR Technology" nominasiyaları üzrə fərqlənərək qaliblər sırasında yer alıb.

Müsabiqədə Azərbaycanla yanaşı, ABŞ, Vyetnam, Almaniya, Rumıniya, Sinqapur, Birləşmiş Ərəb Əmirlikləri və bir sıra digər ölkələrdən layihələr də iştirak edib.

Qeyd edək ki, bu il xidmət ümumilikdə 17 beynəlxalq mükafata layiq görülüb.