Vaşinqton Tehrana qarşı davam edən aqressiv ritorikaya baxmayaraq, İranın danışıqlara razılıq verməsini qiymətləndirməlidir.

İranın Xarici İşlər Nazirliyinin rəsmi nümayəndəsi İsmail Baqai bu barədə özünün sosial media hesabında yazıb.

“Tam ciddilik və aşkar ehtiyatla biz diplomatiyaya real şans veririk. ABŞ İrana qarşı davam edən aqressiv ritorikaya baxmayaraq qəbul edilən bu qərarı yüksək qiymətləndirməlidir”, – deyə İsmail Baqai bildirib.

İran və ABŞ nümayəndə heyətləri arasında məsləhətləşmələrin birinci raundu aprelin 12-də Omanda baş tutacaq. Danışıqlarda İranın xarici işlər naziri Abbas Əraqçi və ABŞ Prezidentinin xüsusi nümayəndəsi Stiven Vitkoff iştirak edəcək. Tehranın bəyanatına görə, danışıqlar birbaşa deyil, Omanın vasitəçiliyi ilə aparılacaq. ABŞ Dövlət Departamentinin mətbuat katibi Temmi Bryus isə tədbirin danışıqlar deyil, görüş kimi xarakterizə edilməli olduğunu vurğulayıb.